وفاقی وزیراطلاعات فوادچوہدری نے کہا ہے کہ بجٹ میں سرکاری ملازمین کی تنخواہوں میں اضافہ کیا گیا ہے۔

تفصیلات کے مطابق وفاقی وزیراطلاعات فوادچوہدری نے اپنے ایک بیان میں کہا کہ اپوزیشن سیاستدانوں کو بدنام کرنے کے مشن پر ہے۔

انہوں نے کہا کہ اپوزیشن نے بجٹ تقریر نہیں سنی اور احتجاج کر رہے ہیں ،اپوزیشن بجٹ تقریر سن لیتی تو احتجاج کی ضرورت پیش نہ آتی۔

فوادچوہدری نے یہ بھی کہا کہ اپوزیشن نے پہلے ہی ذہن بنا رکھا تھا کہ شور شرابہ کرنا ہے ،ن لیگ اور پیپلز پارٹی آئندہ 5 سال بھی احتجاج کرتی رہیں گی۔

وفاقی وزیراطلاعات کا کہنا تھا کہ پیپلزپارٹی اور ن لیگ کے احتجاج سے کوئی فرق نہیں پڑے گا۔

انہوں نے کہا کہ اپوزیشن بجٹ کا مطالعہ کرے اور تجاویز دے کہ وہ کیا چاہتی ہے۔

فوادچوہدری نے یہ بھی کہا کہ اپوزیشن کا ایک ہی مطالبہ ہے کہ انکے کیسز ختم کر دیں۔

وفاقی وزیراطلاعات کا کہنا تھا کہ یہ کیسز ہمارے ذاتی نہیں ہیں کہ ہم معاف کر دیں۔

انہوں نے کہا کہ لوٹا ہوا پیسہ واپس کردیں تو کیسز ختم ہو جائیں گے۔

فوادچوہدری نے یہ بھی کہا کہ وزیراعظم عمران خان نے ملک کو معاشی دلدل سے نکالا ہے۔

وفاقی وزیراطلاعات کا کہنا تھا کہ عمران خان نے قرضوں کی زنجیر میں جکڑی قوم کو نئی امید دی ہے۔

انہوں نے کہا کہ وزیراعظم نے معاشی اور انتظامی اصلاحات کا تاریخی سفر شروع کیا ہے۔

وفاقی وزیراطلاعات فوادچوہدری نے مزید کہا کہ عمران خان کی مثبت پالیسیوں سے ملک میں ترسیلات زر میں اضافہ ہوا ہے۔