اسپیکر قومی اسمبلی اسد قیصر نے صحافیوں سے غیر رسمی گفتگو کی ہے۔

صحافیوں سے بات چیت کے دوران ان کا کہنا تھا کہ  کچھ  دنوں سے قومی اسمبلی میں ہونے والے واقعات قابل افسوس ہے، ایسے واقعات جمہوریت کیلئے نیک شگون نہیں ہیں۔

ان کا کہنا تھا کہ کوشش ہے قانون کے مطابق ایوان کی کارروائی کو چلایا جائے ، میں حکومت اور اپوزیشن کو ایک پیج پر بٹھانے کیلئے کوشش کر رہا ہوں۔

اسد قیصر نے مزید کہا کہ  بجٹ اجلاس میں بحث اور تقاریر انتہائی اہم ہیں، اپوزیشن اور حکومت سے درخواست ہے کہ ایوان کے تقدس کا خیال کریں۔

پارلیمنٹ کا تقدس پامال نہیں ہونا چاہیے، تحریک عدم اعتماد لانا اپوزیشن کا قانونی حق ہے۔

ان کا مزید کہنا تھا کہ اپوزیشن اپنے حق کا استعمال کرے لیکن ایوان کے اندر پارلیمانی روایات کا خیال رکھا جائے۔

اسپیکر اسد قیصر نے کہا کہ  ایوان چلانا اپوزیشن اور حکومت کی مشترکہ ذمہ داری ہے ، میں اپنے حلف کے تقاضوں کے مطابق ایوان   چلائونگا۔

ان کا کہنا تھا کہ  ایوان میں ہلڑ بازی پر ایکشن لیا اور ارکان پر پابندی عائد کی ہے جبکہ میری کسی کے ساتھ ذاتی دشمنی نہیں ہے  ایوان کے تقدس کی بحالی کیلئے اقدامات کیئے ہیں۔

انہوں نے مزید کہا کہ  ایسا ٹرینڈ سیٹ کرنا چاہیے جس پر آنے والی نسلیں عمل کریں اور گائیڈنس لیں۔

گزشتہ روز وزیراعظم  عمران خان ، اپوزیشن لیڈر اور بلاول بھٹو سے بات کی ہے جبکہ میں اس ایوان کے تقدس کی بحالی کیلئے سیاسی جماعتوں کے پارلیمانی لیڈرز سے رابطے میں ہوں۔

اسد قیصر نے یہ بھی بتایا کہ میرا استعفیٰ احسن اقبال کی خواہش ہوسکتی ہے ، میں مینڈیٹ کے مطابق ذمے داریاں ادا کرتا رہوں گا۔

بجٹ پر ارکان اپنے حلقوں کے مسائل پر بات کرتے ہیں ، کوشش ہے ارکان بجٹ اجلاس پر سیر حاصل بحث ہو۔