وزیراعظم عمران خان نے کہا ہے کہ چھوٹے کاشتکاروں کو ان کی محنت کا جائز منافع ملا ہے۔

 تفصیلات کے مطابق وزیراعظم عمران خان سے وزیر برائے نیشنل فوڈ سیکیورٹی سید فخر امام کی ملاقات ہوئی جس میں وزیر اعظم کو ملک میں گندم، چاول، مکئی، مونگ، پیاز اور آلو کی پیداوار، اور لائیو اسٹاک کی بحالی پر بریفنگ دی گئی۔

وزیراعظم عمران خان نے حکومت کی جانب سے زرعی شعبے کی بحالی کے لئے اٹھائے جانے والے اقدامات پر اطمینان کا اظہار کیا۔

ملاقات میں عمران خان نے کہا کہ ملک کے زرعی شعبے کی ترقی کے لئے پیداواری صلاحیت کو مزید بڑھانے کے حوالے سے تمام وسائل بروئے کار لائے جارہے ہیں۔

وزیراعظم عمران خان نے کہا کہ چھوٹے کا شتکاروں کو ان کی محنت کا جائز منافع ملا ہے، ان کا معیار زندگی بہتر ہونے کے ساتھ ساتھ ملک کی معیشت پر بھی مثبت اثرات مرتب ہو رہے ہیں۔