وفاقی وزیر اطلاعات فواد چوہدری کا کہنا ہے کہ پاکستان اور کشمیر میں مجموعی طور پر انتخابی عمل پرامن رہا ہے۔

تفصیلات کے مطابق وفاقی وزیر اطلاعات فواد چوہدری نے میڈیا سے گفتگو کرتے ہوئے کہا کہ آزاد کشمیر انتخابات میں عمران خان کی کامیابی سے بھارت بہت خائف ہے، آج الیکشن میں عوام نے بڑھ چڑھ کر بلے پر مہر لگائی ہے، انشا اللہ کشمیر میں پی ٹی آئی ہی حکومت بنائے گی۔

انہوں نے کہا کہ آج بھارتی میڈیا نے کشمیر کے حوالے سے عمران خان حکومت کی بھر پور مخالفت کی، آزاد کشمیر میں عمران خان کی حکومت بننے سے انڈیا کو بہت بڑا دھچکا لگے گا، پی ٹی آئی امیدوار کو ووٹ دینے پر شہریوں کا شکریہ ادا کرتے ہیں۔

 فواد چوہدری نے کہا کہ پاکستان کے اندر آزادانہ، منصفانہ انتخابی عمل مقبوضہ کشمیر کی عوام کو امید اور جلا بخشتی ہے، ایک دن ضرور مقبوضہ کشمیر کی عوام آزادانہ انتخابات میں حق رائے دہی استعمال کریں گی۔

وفاقی وزیر اطلاعات فواد چوہدری نے مزید کہا کہ بد قسمتی سے ایک واقعے کے دوران پی ٹی آئی کارکن شہید ہوا ہے، پیپلز پارٹی کے کچھ لوگوں نے پولنگ کے دوران کئی جگہوں پر حملے کیے ہیں، 50 فیصد سے زائد ٹرن آؤٹ ہونا ایک مثبت پیش رفت ہے۔