لاڑکانہ میں کورونا کی خطرناک چوتھی ڈیلٹا ویریئنٹ لہر کے باوجود شہر میں ٹیسٹ تاحال بند ہیں۔

تفصیلات کے مطابق چانڈکا ہسپتال کی پی سی آر لیب میں مینوئل کٹس ختم ہونے کے باعث چھٹے روز بھی کورونا ٹیسٹ شروع نہیں کیے جاسکے ہیں جس کے باعث شہری شدید پریشانی کا شکار ہیں۔

 کورونا ٹیسٹ نہ ہونے کی وجہ سے دس سینٹرز پر کورونا سیمپل کلیکشن بھی متاثر ہے۔

ذرائع کا کہنا ہے کہ محکمہ صحت کی جانب سے ڈی جی ہیلتھ ارشاد میمن کو آگاہی کے باوجود ٹیسٹنگ کٹس کی فراہمی ممکن نہیں بنائی جاسکی ہے۔

کووڈ فوکل پرسن ڈاکٹر فرمان ابڑو  کہتے ہیں کہ چانڈکا ہسپتال کی پی سی آر لیب میں مینوئل کٹس ختم ہونے کی وجہ سے کورونا ٹیسٹ نہیں ہو رہے ہیں جبکہ جمع شدہ چند سیمپلز سکھر لیب بھیجے وہاں سے نتائج تو بھیجے گئے ہیں تاہم ہارڈ کاپی موجود نہیں ہے۔

انہوں نے یہ بھی کہا ہے کہ ضلع بھر میں نودیرو، رتودیرو، ڈوکری، باڈہ، آریجا سمیت سی ایم سی میں قائم دس کورونا سیمپل کلیکشن سینٹرز پر سیمپلنگ متاثر ہوئی ہے۔

واضح رہے کہ چانڈکا ٹیچنگ ہسپتال میں قائم کورونا ویکسین سینٹر میں عملہ بھی غائب ہے۔