وزیراعظم عمران خان نے کہا ہے کہ سیاحت کے شعبے کا فروغ حکومت کی اولین ترجیحات میں شامل ہے۔

تفصیلات کے مطابق وزیر اعظم عمران خان سے وزیراعلیٰ خیبرپختونخوا محمود خان کی ملاقات ہوئی۔

ملاقات میں وزیرِ اعلیٰ خیبرپختونخوا نے وزیراعظم کو مختلف اضلاع میں جاری سیاحتی سرگرمیوں سے آگاہ کیا جبکہ وزیرِ اعلیٰ خیبرپختونخوا نے ملکی و غیرملکی سیاحوں کو سہولت دینے اور مسائل کے حل کے لیے اقدامات سے بھی آگاہ کیا۔

محمود خان نے وزیر اعظم کو انضمام شدہ اضلاع میں جاری ترقیاتی منصوبوں کی پیشرفت پر بھی بریفنگ دی۔

اس موقع پر وزیر اعظم عمران خان نے کہا کہ ملک میں سیاحت کے شعبے کا فروغ تحریک انصاف کی حکومت کی اولین ترجیحات میں شامل ہے۔

عمران خان نے کہا کہ سیاحت کے فروغ سے مقامی علاقوں میں معاشی سرگرمیاں پیدا ہوں گی۔

وزیر اعظم عمران خان نے کہا کہ معاشی سرگرمیاں بڑھنے سے ملکی معیشت پر بھی مثبت اثرات مرتب ہوں گے۔