صوبائی وزیر صنعت وتجارت میاں اسلم اقبال نے کہا کہ پنجاب کو سرمایہ کاری اور تجارتی و معاشی سرگرمیوں کا حب بنائیں گے۔

تفصیلات کے مطابق صوبائی وزیر صنعت وتجارت میاں اسلم اقبال کی زیر صدارت پنجاب سرمایہ کاری بورڈ کے کمیٹی روم میں اجلاس ہوا جس میں دبئی ایکسپو، پنجاب میں سرمایہ کاری کے فروغ اور سرمایہ کاروں کو سہولتوں کی فراہمی کے امور کا جائزہ لیا گیا۔

اس اجلاس میں سی ای او پنجاب سرمایہ کاری بورڈ ڈاکٹر ارفع اقبال اور بورڈ کے متعلقہ افسران نے شرکت کی۔

اسلم اقبال نے کہا کہ پنجاب میں سرمایہ کار دوست ماحول کی وجہ سے ملکی و غیر ملکی سرمایہ کار پنجاب کا رخ کر رہے ہیں، ملک میں بڑھتی ہوئی سرمایہ کاری وزیر اعظم عمران خان کی معاشی پالیسیوں پر اعتماد کا اظہار ہے۔

انہوں نے کہا کہ رواں سال منعقد ہونے والی دبئی ایکسپو میں پنجاب بھرپور شرکت کرے گا، صوبے میں نئے بننے والے صنعتی مراکز سے پنجاب میں صنعتی ترقی کے نئے دور کا آغاز ہوگا۔

صوبائی وزیر صنعت وتجارت میاں اسلم اقبال نے مزید کہا کہ پنجاب سرمایہ کاری بورڈ صوبے میں سرمایہ کاری کے فروغ اور سرمایہ کاروں کو سہولتوں کی فراہمی میں کوئی کسر اٹھا نہ رکھے۔