ضیاء الدین یونیورسٹی امتحانی بورڈ کے تحت میٹرک اور انٹرمیڈیٹ کے امتحانات کا عمل کھٹائی میں پڑ گیا ہے۔

تفصیلات کے مطابق امتحان شروع ہونے میں چند گھنٹے رہ گئے، تاحال ہزاروں طلبا کو ایڈمٹ کارڈ نہیں مل سکے، اسکول انتظامیہ اور والدین کا ضیاء الدین یونیورسٹی امتحانی بورڈ میں رش ہوگیا۔

ذرائع کے مطابق نجی تعلیمی بورڈز نے سرکاری اسکول میں سینٹرز قائم تو کر لیے تاحال امتحانات منعقد کروانے کے لئے عملے کا بندوبست نہیں ہو سکا، ضیاء الدین یونیورسٹی امتحانی بورڈ نے محکمہ تعلیم سندھ کے ماتحت 20 سرکاری اسکولوں میں امتحانی مراکز قائم کیے ہیں۔

اس کے علاوہ ضیاء الدین یونیورسٹی امتحانی بورڈ انتظامیہ نے پولیس کو طلب کر لیا ہے۔

واضح رہے کہ ضیاء الدین یونیورسٹی امتحانی بورڈ کے تحت آج دسویں جماعت کا طبیعیات جبکہ بارہویں جماعت کا کیمیا اور کمپیوٹر سائنس کا امتحان لیا جائے گا۔