وزیراعظم آزاد جموں وکشمیر سردار عبد القیوم نیازی نے کہا ہے کہ بھارت کا واویلا اور چیخیں ہی کے پی ایل کی کامیابی ہے۔

تفصیلات کے مطابق وزیراعظم آزاد جموں وکشمیر سردار عبد القیوم سے چیئرمین کشمیر کمیٹی شہریار آفریدی کی مظفر آباد میں ملاقات ہوئی جس میں کشمیر پریمیئر لیگ اور نوجوانوں کیلئے بہترین کھیلوں کی سرگرمیاں سے متعلق امور پر تفصیلی تبادلہ خیال کیا گیا۔

کے پی ایل وفد نے بھرپور تعاون اور سہولیات کیلئے آزاد حکومت کا شکریہ ادا کیا اور کہا کہ کے پی ایل کے انعقاد میں تحریک انصاف کی وفاقی حکومت کا بھرپور تعاون رہا۔

ملاقات میں چیئرمین کشمیر کمیٹی شہریار آفریدی نے کہا کہ ہم نے کے پی ایل کے ذریعے کشمیری نوجوانوں کو ایک پلیٹ فارم مہیا کیا تاکہ وہ اپنی صلاحیتوں کو نکھار سکیں، ہم نے کے پی ایل کو سیاست سے پاک رکھا، فائنل میں تمام جماعتوں کے نمائندوں کے مدعو کریں گے۔

اس موقع پر وزیراعظم آزاد جموں و کشمیر سردار عبد القیوم نیازی نے کہا کہ بھارت کا واویلا اور چیخیں ہی کے پی ایل کی کامیابی ہے آج کے پی ایل کی وجہ سے بھارت کی چیخیں دنیا بھر کو سنائی دے رہی ہیں۔

وزیراعظم آزاد جموں وکشمیر نے مزید کہا کہ کے پی ایل کے دوسرے سیزن کو مزید شاندار بنانے کیلئے بھرپور تعاون فراہم کریں گے۔

ملاقات میں شہریارآفریدی کے ہمراہ کشمیر پریمیئر لیگ کے وفد نے بھی شرکت کی جبکہ ملاقات میں ممبر قانون ساز اسمبلی دیوان چغتائی بھی موجود تھے۔