امیر جماعت اسلامی سراج الحق نے کہا ہے کہ میڈیا آزاد ہوگا تو ملک ترقی کرے گا۔

 تفصیلات کے مطابق امیر جماعت اسلامی سراج الحق نے اپنے ایک بیان میں کہا کہ صحافیوں کو ڈرانے دھمکانے اور خوفزدہ کرنے کے تمام حربوں کی سخت مذمت کرتے ہیں۔

 امیر جماعت اسلامی نے کہا کہ کارکنان تحریک اسلامی میڈیا سے وابستہ افراد کو عزت و احترام دیں۔  آزاداور خود مختار میڈیا کے حامی ہیں۔

سراج الحق نے یہ بھی کہا کہ قوم کا آئین پاکستان اور پارلیمانی سسٹم پر اتفاق ہے، صدارتی نظام کے شوشے چھوڑ کر اختلافات کو ہوا نہ دی جائے۔

امیر جماعت اسلامی کا کہنا تھا کہ صاف اور شفاف انتخابات کے لیے الیکٹورل ریفارمز وقت کی ضرورت ہیں۔ آزاد کشمیر الیکشن میں نتائج طے شدہ تھے، سرکاری وسائل کو استعمال کیا گیا۔

سراج الحق کا یہ بھی کہنا تھا کہ آئی ایم ایف کے اشاروں پر پیٹرولیم ودیگر اشیائے ضروریہ کی قیمتوں میں اضافہ کیا جاتا ہے۔

  امیر جماعت اسلامی نے کہا کہ مہنگائی کی تمام ذمہ داری موجودہ حکومت پر ہے ، مخصوص لبرل طبقہ افغانستان میں بدلتے حالات سے خوفزدہ ہے۔

سراج الحق نے یہ بھی کہا کہ نوجوان مایوس نہ ہوں، حقیقی تبدیلی لانے کے لیے جماعت اسلامی کا ساتھ دیں۔

 امیر جماعت اسلامی سراج الحق نے مزید کہا کہ جماعت اسلامی الیکشن اپنے جھنڈے، نشان پر لڑے گی اور سرپرائز دے گی، جماعت اسلامی الیکشن میں پورے ملک میں اپنے نمائندے کھڑے کرے گی۔