پاکستان انٹرنیشنل ائیرلائنز (پی آئی اے) کی جانب سےعاشورہ کے موقع پر عراق کی خصوصی پروازیں چلانے کا اعلان کیا گیا ہے۔

تفصیلات کے مطابق پی آئی اے زائرین کی سہولت کیلئے اسلام آباد، لاہور اور کراچی سے نجف کیلئے براہ راست پروازیں چلائے گا ،11 اگست سے 11 پروازیں زائرین کو لے کے نجف اشرف پہنچیں گی۔

سی ای او ارشد ملک کا کہنا ہے کہ عاشورہ پر پاکستان سے براہ راست پروازوں کا مطالبہ بہت عرصے سے کیا جارہا تھا جبکہ تمام مذہبی مواقعوں پر خصوصی پروازوں کا انعقاد پی آئی اے کی ہمیشہ سے روایت رہی ہے۔

انہوں نے مزید بتایا کہ زائرین کی خدمت اور ان کی معاونت قومی ائیرلائن کی حیثیت سے ہماری ذمہ داری ہے ، حکومت اور وزیر ہوابازی کی خصوصی ہدایات پر یہ پروازیں ایسے ترتیب دی جارہی ہیں کہ زائرین کو کسی قسم کی دشواری نہ ہو۔

واضح رہے کہ زائرین کی واپسی کا آپریشن 21 اگست سے ترتیب دیا گیا ہے۔