وزیر اعلیٰ پنجاب سردار عثمان بزدار نے کہا ہے کہ خاتون سے دست درازی کا واقعہ دردناک اور دل دہلا دینے والا ہے۔

تفصیلات کے مطابق وزیر اعلیٰ پنجاب سردار عثمان بزدار نے اپنے ایک بیان میں کہا کہ متاثرہ خاتون کے ساتھ دلی ہمدردی ہے اور انصاف مہیا کرنا ریاست کی ذمہ داری ہے۔

وزیر اعلیٰ پنجاب نے کہا کہ پولیس حکام کو ہدایت کی ہے کہ ویڈیوز کی مدد سے واقعہ میں ملوث ملزمان کی نشاندہی کر کے گرفتاریاں کی جائیں ۔

سردار عثمان بزدار نے یہ بھی کہا کہ خاتون سے دست درازی کا واقعہ دردناک اور دل دہلا دینے والا ہے، افسوسناک واقعہ میں نا صرف انصاف ہوگا بلکہ ہوتا ہوا نظر بھی آئے گا۔

وزیر اعلیٰ پنجاب سردار عثمان بزدار نے مزید کہا کہ حکومت خاتون کو انصاف کی فراہمی کے لئے آخری حد تک جائے گی۔

خیال رہے کہ خاتون کو تنگ کرنے کا واقعہ یوم آزادی پر پیش آیا تھا جب خاتون 14اگست کے حوالے سے ویڈیو بنا رہی تھیں۔

پولیس کی جانب سے کارروائی کرتے ہوئے تھانہ لاری اڈا میں مقدمہ درج کرلیا گیا ہے، درج مقدمے کے متن کے مطابق خاتون یوٹیوبر ہے جبکہ حملہ آور ہجوم میں 400 سے 500 افراد شامل تھے۔