افغان طالبان کے ترجمان ذبیح اللہ مجاہد نے کہا ہے کہ دربدر ہونے کے بجائے اپنے ملک میں باعزت طریقے سے رہیں۔

تفصیلات کے مطابق لائیو پریس کانفرنس کرتے ہوئے ذبیح اللہ مجاہد کا کہنا تھا کہ ہمارا واحد مقصد اپنے ملک کی تعمیر ہے، ہم امن لانے کی کوشش کر رہے ہیں۔

ترجمان ذبیح اللہ مجاہد نے کہا کہ ہم نے سب کچھ بھلا دیا ہے، میں سب کو یقین دلاتا ہوں ہمارے پاس کوئی لسٹ نہیں ہے ہم کسی کا پیچھا نہیں کر رہے۔

ان کا کہنا تھا کہ طالبان کے سیاسی شعبے کے نمائندے کابل میں موجود ہیں، تمام ممالک کے سفیروں سے ملاقات کرکے انہیں امن اور تحفظ کی یقین دہانی کروائیں گے۔

انہوں نے کہا کہ ہم تمام افغانوں کو تحفظ کا یقین دلاتے ہیں اور نجشیر میں اپنے بھائیوں سے کہتے ہیں کہ کابل واپس آجائیں، ہماری زندگیاں اور مقاصد مشترک ہیں، خوفزدہ نہ ہوں، لڑائی نہ کریں۔

ذبیح اللہ کا کہنا تھا کہ میڈیا نے اپنا کام شروع کر دیا ہے، اور صحافیوں کا اطمینان بڑھتا جا رہا ہے۔

ترجمان افغان طالبان نے کہا کہ تمام بینکوں نےآزادی کے ساتھ کام شروع کردیا ہے، لوگ بینکوں سے اپنی رقوم نکلواسکتے ہیں۔

ذبیح اللہ نے کہا کہ افغان عوام کیلئے کابل ایئرپورٹ کا راستہ مکمل طور پر بند ہے، جوسفارت خانےکابل میں فعال ہیں ان کا شکریہ ادا کرتے ہیں۔

ان کا کہنا تھا کہ کچھ روز سے کابل سمیت ملک کے کسی حصے میں تشدد یا قتل وغارت کا کوئی واقعہ نہیں پیش آیا، کابل ایئرپورٹ کےعلاوہ پورے ملک میں حالات نارمل ہیں۔

ترجمان افغان طالبان نے کہا کہ پورے افغانستان میں کوئی خون خرابہ نہیں ہوا، پچھلے 10 دنوں سے کابل سمیت پورے ملک میں امن ہے۔

افغان طالبان کے ترجمان ذبیح اللہ مجاہد کا مزید کہنا تھا کہ 20 سال پورے ملک نے جنگ کا سامنا کیا، ملک کے حالات کنٹرول میں ہیں، حکومت سازی کیلئے مشاورتی عمل کامیابی سےجاری ہے۔