وزیراعلیٰ پنجاب سردار عثمان بزدار کا کہنا ہے کہ پنجاب کو ترقی کی راہ پر گامزن کردیا ہے۔

تفصیلات کے مطابق وزیراعلیٰ پنجاب سردار عثمان بزدار سے صوبائی وزیرجیل خانہ جات و ترجمان پنجاب حکومت فیاض الحسن چوہان کی ملاقات ہوئی جس میں فیاض الحسن چوہان نے وزیراعلیٰ عثمان بزدار کو محکمے کی کارکردگی سے آگاہ کیا۔

وزیراعلیٰ پنجاب عثمان بزدار نے پنجاب حکومت کی کارکردگی کو اجاگر کرنے کے لئے گائیڈ لائنز دیں اور کہا کہ 3 برس میں صوبے کی ترقی اور عوام کی خوشحالی کے لئے پائیدار اقدامات کیے ہیں۔

عثمان بزدار نے کہا کہ پنجاب کو ترقی کی راہ پر گامزن کردیا ہے، اپوزیشن خود انتشار کا شکار ہے، جن کا اپنا ہاؤس ڈس آرڈر ہے وہ ان ہاؤس کی تبدیلی کے صرف دعوے ہی کرسکتے ہیں۔

وزیراعلیٰ پنجاب عثمان بزدار نے مزید کہا کہ حکومت پہلے سے زیادہ مضبوط اور مستحکم ہے، اپوزیشن کے غیر جمہوری ہتھکنڈوں کا جواب عوام کی خدمت سے دیں گے، پاکستان کی عوام باشعور ہے، منفی پروپیگنڈے میں نہیں آئے گی۔

دوسری جانب ترجمان پنجاب حکومت فیاض الحسن چوہان نے کہا کہ مخالفین خاطر جمع رکھیں، ان کی دال 2023 تک نہیں گلے گی، پی ڈی ایم کے ٹولے کا منفی سیاست سمیت جنازہ نکل چکا ہے، عوام نے آر پار کے دعویداروں کے غبارے سے ہوا نکال دی ہے۔

فیاض الحسن چوہان نے مزید کہا کہ دیانتداری، ایمانداری اور شفافیت کی سیاست کے سامنے کرپٹ ٹولے کی کوئی حیثیت نہیں ہے۔