سارہ اسلم کا کہنا ہے کہ پنجاب بھر میں کورونا کی مثبت شرح 6.2 ریکارڈ کی گئی ہے۔

تفصیلات کے مطابق محکمہ پرائمری اینڈ سکینڈری ہیلتھ کی سیکرٹری سارہ اسلم نے کہا ہے کہ پنجاب میں کورونا وائرس کے کیسز میں اضافہ جاری ہے، ویکسینیشن ہی کورونا وائرس  کے  خلاف  واحد اور موثر علاج ہے، 18 سال سے زیادہ عمر  کے تمام افراد کےفوری طور پر ویکسین لگوائیں۔

ان کا کہنا ہے کہ گزشتہ 24 گھنٹوں کے دوران صوبہ بھر سے 1,230 نئے کیسز رپورٹ ہوئے ہیں، صوبہ بھر میں کورونا کے کیسز کی ٹوٹل تعداد 367,054 ہو گئی ہے، صوبہ بھر میں ایکٹیو کیسز کی تعداد 19,113 ہو گئی ہے۔

انھوں نے بتایا ہے کہ گزشتہ روز لاہور میں کورونا سے 4 اموات رپورٹ ہوئی ہیں جس سے صوبہ بھر میں اموات کی کل تعداد 11,254 ہو گئی ہے، صوبہ بھر میں اب تک مجموعی طور پر 6,375,927 ٹیسٹ کیے جا چکے ہیں۔

سارہ اسلم نے مزید کہا ہے کہ پنجاب بھر میں کورونا کی مثبت شرح 6.2 ریکارڈ کی گئی ہے، شہری کورونا سے بچاؤ کیلئے حفاظتی تدابیر اختیار کریں، شہری پر ہجوم اجتماعات  سے مکمل اجتناب کریں اور ماسک کا استعمال لازمی بنائیں۔