پی پی پی چیئرمین بلاول بھٹو زرداری نے پٹرولیم مصنوعات کی قیمتوں میں اضافہ مسترد کردیا۔

تفصیلات کے مطابق پی پی پی چیئرمین بلاول بھٹو زرداری نے اپنے ایک بیان میں کہا کہ غریب عوام کی مشکلات سے بے حس حکومت نے ایک بار پھر اپنے اخراجات پورا کرنے کے لیئے پٹرول بم کا سہارا لیا، ایک ماہ کے اندر پٹرول کی قیمت میں دس روپے لیٹر اضافہ کیا گیا ہے۔

پی پی پی چیئرمین کا کہنا تھا کہ پی پی پی کی سابقہ حکومت نے مشکل ترین حالات کے باوجود پٹرول کی قیمتوں کو مستحکم رکھا۔

بلاول بھٹو زرداری کا یہ بھی کہنا تھا کہ پٹرول مصنوعات میں اضافے سے مہنگائی مزید بڑھے گی، پاکستان مزید مہنگائی کا متحمل نہیں ہوسکتا۔

پی پی پی چیئرمین نے کہا کہ سلیکٹڈ حکومت کی نااہلی اور ناکامیاں ملک کے آگے بڑھنے میں رکاوٹ بن چکے ہیں۔

بلاول بھٹو زرداری نے یہ بھی کہا کہ سلیکٹڈ وزیراعظم سے ملک نہیں چل رہا، جو فقط جھوٹ بولنے اور سیاسی انتقام کے علاوہ کچھ نہیں جانتا۔

پی پی پی چیئرمین بلاول بھٹو زرداری نے مزید کہا کہ خان صاحب! عوام پر رحم کرو، پٹرول کی قیمتوں میں اضافہ واپس لو اور ٹیکسز کم کرو۔