سندھ حکومت نے کورونا ایس او پیز کی خلاف ورزی پر ایس ایچ او کو کارروائی کا اختیار دے دیا ہے۔

تفصیلات کے مطابق سندھ حکومت نے صوبے میں کورونا ایس او پیز کی خلاف ورزی پر پولیس کو بھی کارروائی کا اختیار دے دیا، محکمہ داخلہ سندھ کی جانب سے ترمیمی نوٹیفکیشن جاری کردیا گیا ہے۔

نوٹیفکیشن کے مطابق پولیس انسپکٹر اورایس ایچ او دکانوں، صنعتوں، دفاتر میں کورونا ایس او پیز کی خلاف ورزی پر کارروائی کر سکیں گے، ایس او پیز کی خلاف ورزی پرنوٹس کا اجراءاورہدایات دے سکیں گے۔

دوسری جانب وزیراعلیٰ سندھ مراد علی شاہ نے صوبے میں کرونا وائرس کی صورتحال سے متعلق بیان میں کہا کہ گذشتہ 24 گھنٹوں میں صوبے بھر میں مزید اٹھارہ سو سینتالیس کیسز رپورٹ ہوئے جبکہ چھتیس افراد اس وبا کے باعث انتقال کرگئے، جس کے بعد صوبے میں کرونا سے ہلاکتوں کی تعداد چھ ہزار ستاون ہوگئی۔