پاکستان مسلم لیگ (ن) پنجاب کے صدر راناثناءاللہ نے کہا ہے کہ سی پیک کے خلاف اس ملک  پر مسلط کئے گئے وزیراعظم کے ذریعے سازش ہو رہی ہے۔

تفصیلات کے مطابق پاکستان مسلم لیگ (ن) پنجاب کےصدر رانا ثناءاللہ نے وزیر داخلہ شیخ رشید کے بیان پر ردعمل دیتے ہوئے کہا کہ  عمران نیازی اینڈ ٹولہ سی پیک کے خلاف انٹرنیشنل سازش کا حصہ ہے۔

ان کا کہنا تھا کہ  23 غیرقانونی فارن فنڈنگ اکاونٹس سے پیسے منگواکر ملک کے خلاف سازش کرنے والے کہہ رہے ہیں سی پیک کے خلاف انٹرنیشنل سازش ہورہی ہے،سی پیک کے خلاف سازش میں پاکستان میں مسلط ٹولہ ملوث ہے ۔

رانا ثناءاللہ کا کہنا تھا کہ نوازشریف نے خطے کو تحفہ دیا تھا، 2018 تک اس پرتیز رفتارعمل کو ساری دنیا جانتی ہے، جب سےعمران نیازی کی حکومت مسلط ہوئی، سی پیک پر عمل درآمد رُک چکا ہے ۔

پاکستان مسلم لیگ (ن) پنجاب کے صدر راناثناءاللہ کا مزید کہنا تھا کہ عمران نیازی اینڈٹولے نے سی پیک پر الزامات لگائے اسے متنازعہ بنانے کی کوشش کی، عمران نیازی اینڈ کمپنی کے دور میں جے سی سی کا اجلاس بھی نہیں ہوسکا۔