پاکستان مسلم لیگ (ن) کے صدر شہباز شریف کا کہنا ہے کہ ڈاکٹر کورونا سے اور حکومت ڈاکٹرز سے لڑ رہی ہے۔

تفصیلات کے مطابق پاکستان مسلم لیگ (ن) کے صدر شہباز شریف نے ڈاکٹرز پر پولیس کے تشدد کی مذمت کی ہے۔

انہوں نے کہا کہ پڑھے لکھے لوگوں پر لاٹھیاں برسا کر حکومت جہالت کا مظاہرہ کررہی ہے، مسئلہ سننے، سمجھنے اور خوش اسلوبی سے حل کرنے کے بجائے لاٹھی اور آنسو گیس استعمال کرنا افسوسناک ہے۔

انہوں نے کہا کہ مفت دوائی ختم کرنے اور قیمت میں 500 فیصد اضافے کے بعد اب ڈاکٹرز پر لاٹھیاں برسائی جارہی ہیں، کورونا سے عوام کو بچانے کی جنگ لڑنے والوں پر لاٹھیاں اور آنسو گیس چلائی جارہی ہے۔

شہباز شریف نے کہا کہ تین سال سے اساتذہ، طالب علم، مزدور، خواتین اور پینشنرز ظلم پر آواز اٹھانے والا ہر شہری حکومت سے لاٹھیاں کھارہا ہے۔

پاکستان مسلم لیگ (ن) کے صدر شہباز شریف نے مزید کہا کہ پولیس گردی کا شکار ہونے والے ڈاکٹرز سے ہمدردی ہے اور ان کے ساتھ یکجہتی کرتے ہیں۔