وزیرمملکت زرتاج گل نے کہا کہ پاکستان کا جھنڈا ضرور لہرائیں مگر اپنے حصے کا پودا بھی لگائیں۔

تفصیلات کے مطابق وزیر مملکت زرتاج گل نے میڈیا سے گفتگو کرتے ہوئے کہا کہ اسلام آباد سینٹارس مال میں ہینڈی کرافٹ نمائش کا افتتاح کردیا ہے۔

زرتاج گل نے تمام شرکاء کو ماسک استعمال کرنے کی ہدایت دیتے ہوئے کہا کہ کورونا وائرس کی چوتھی لہر خطرناک ہے اس سے بچاؤ بہت ضروری ہے۔

انہوں نے کہا کہ وزیراعظم نے جو کامیاب جوان پروگرام شروع کیا ہے اس میں خواتین کے لیے بہت اچھے مواقع ہیں، خواتین ضرور اس پروگرام سے فائدہ اٹھائیں، ہماری مصنوعات کم ہوتی جارہی ہیں، ہماری اپنی کرافٹس بہت بہتر ہیں۔

وزیرمملکت زرتاج گل نے مزید کہا کہ مون سون پلانٹیشن میں ہم کو 50 کروڑ درخت لگانے ہیں، پاکستان کا جھنڈا ضرور لہرائیں مگر اپنے حصے کا پودا بھی لگائیں، اربن فلڈنگ کی بدترین مثال سامنے آچکی ہے اگر آنے والی نسلوں کے لیے پاکستان کو بچانا ہے تو اپنے حصے کا ایک پودا ضرور لگائیں۔