وزیر اعظم کے معاون خصوصی برائے سیاسی ابلاغ ڈاکٹر شہباز گل کا کہنا ہے کہ پاکستان کو سرسبز و شاداب بنانا وزیر اعظم کا وژن ہے۔

تفصیلات کے مطابق وزیر اعظم کے معاون خصوصی برائے سیاسی ابلاغ ڈاکٹر شہباز گل نے میڈیا سے گفتگو کرتے ہوئے کہا کہ راوی ریور منصوبے کو سیاحت کے لیے بھی پر کشش بنائیں گے، جنگل سے کوئی اگر درخت کاٹے گا تو فوری اطلاع ملے گی۔

انہوں نے کہا کہ اسمارٹ جنگل میں سینسرز اور جیمرز لگے ہوں گے، شیخوپورہ میں 24 ہزار کینال پر جنگل لگایا جائے گا، چینی کمپنی کے تعاون سے 24 ہزار کینال پر اسمارٹ جنگل لگایا جائے گا اور 7050 کینال پر انوائرمنٹ فرینڈلی جنگل لگایا جائے گا۔

شہباز گل نے کہا کہ اگلے الیکشن کا سوچنے والے جنگلات جیسے منصوبے شروع نہیں کرتے، میٹرو، اورنج بس جیسے منصوبوں سے کک بیکس ملتے ہیں، میٹرو،اورنج جیسے منصوبوں سے آنے والی نسلوں کو کچھ نہیں ملتا۔

وزیر اعظم کے معاون خصوصی برائے سیاسی ابلاغ ڈاکٹر شہباز گل نے مزید کہا کہ پی ڈی ایم کی تھکی سیاست کا جواب اس طرح کے منصوبوں سے دیں گے، پی ڈی ایم مصالحے لگا کر تھکی ہوئی سیاست کر رہی ہے۔