عطا اللہ تارڑ کا کہنا ہے کہ حکومت کا ہائیکورٹ کو خط لکھنا قابل مذمت ہے۔

تفصیلات کے مطابق پاکستان مسلم لیگ ن کے رہنما عطا اللّٰہ تارڑ نے عدالت کے باہر میڈیا سے گفتگو کرتے ہوئے کہا ہے کہ ایک ہی کیس کی 2 مختلف اداروں سے تحقیقات سیاسی انتقام کی انتہا ہے۔

ان کا کہنا ہے کہ سکیورٹی کے نام پر سیاسی کارکنوں اور رہنماؤں کیساتھ سلوک کی بھر پور مذمت کرتے ہیں، وفاقی حکومت نے اب ہائیکورٹ کے چیف کے اختیارات پر سوالات اٹھانے شروع کر دیئے ہیں، وفاقی حکومت نے سابق چیف جسٹس نے احتساب عدالت کے ججوں کو تبدیل کرنے سے متعلق ہائیکورٹ سے باز پرس کی ہے۔

انھوں نے کہا ہے کہ وفاقی حکومت کے ہائیکورٹ کو خط میں پوچھا گیا کہ کیا عدالت عالیہ کو ججز ٹرانسفر کرنے کا اختیار تھا یا نہیں، کیا حکومت کو نہیں پتہ کہ عدلیہ اور حکومت کا الگ الگ کردار ہے۔

مسلم لیگ کے رہنما نے کہا ہے کہ حکومت کا ہائیکورٹ کو خط لکھنا قابل مذمت ہے، مسلم لیگ ن کے کیسز کو نشانہ بنانے کیلئے حکومت نے ہائیکورٹ کو خط لکھا ہے۔

عطا اللہ تارڈ نے مزید کہا ہے کہ وفاقی حکومت کا ہائیکورٹ کو خط لکھنا غیر آئینی اور کیسز پر اثر انداز ہونے کے مترادف ہے۔