تحریک انصاف کے رکن سندھ اسمبلی فردوس شمیم نقوی نے کہا ہے کہ آج ایک بار پھر آصف علی زرداری عدالت میں پیش نہیں ہوئے۔

تفصیلات کے مطابق تحریک انصاف کے رکن سندھ اسمبلی فردوس شمیم نقوی نے آصف علی زرداری کے کیس کی سماعت پر غیر حاضری کی وجہ سے توسیع پر ردعمل دیتے ہوئے کہا ہے کہ آصف علی زرداری نے دوبارہ اپنے  ہتھکنڈے اختیار کرنا شروع کردیے۔

انہوں نے کہا کہ آخری بار آصف علی زرداری کا کیس 11 سال چلا ، کسی ایک کیس کا بھی فیصلہ آج تک نہیں سنایا گیا ، فاروق ایچ نائیک اور آصف علی زرداری دونوں مل کر کیس کو نتیجے پر پہنچنے نہیں دیتے ، آج ایک بار پھر آصف علی زرداری عدالت میں پیش نہیں ہوئے ، عدالت میں کبھی گواہ نہیں پیش ہوتے اور کبھی پراسیکیوٹر ، عدالت نے آج ایک بار پھر 15 اکتوبر کی تاریخ دے دی۔

فردوس شمیم نقوی نے کہا ہے کہ عدالت میں بہانے سے پیش نہ ہونا صرف کیس کو طول دینے کے لیے ہے ، مریم نواز نے بھی یہی ہتھکنڈے اختیار کیے ، پہلے ایک وکیل کیا اور اسکے بعد دوسرا وکیل ، آصف زرداری اور مریم نواز کے ہتھکنڈوں سے صرف قوم متاثر ہورہی ہے ، اس ملک سے کرپشن کا خاتمہ صرف ایسے لوگوں کی سزاؤں کے ذریعے ہی ہے۔

تحریک انصاف کے رکن سندھ اسمبلی فردوس شمیم نقوی نے کہا ہے کہ عدالت عظمیٰ ایسے بااثر اور سیاسی افراد کو یومیہ عدالتوں میں بلائے ، ان اشخاص کو قانون کے کٹہرے میں سخت سے سخت سزائیں سنائی جائیں۔