وزیراعظم کے معاون خصوصی برائے سیاسی ابلاغ ڈاکٹر شہباز گِل نے کہا ہے کہ پاکستان کے مسائل کا حل کرپشن کے خاتمے اور قانون کی حکمرانی میں مضمر ہے۔

تفصیلات کے مطابق وزیراعظم کے معاون خصوصی برائے سیاسی ابلاغ ڈاکٹر شہباز گِل نے بلاول بھٹو زرداری کے بیان پر ردعمل دیتے ہوئے کہا کہ آئین شکن آئین کی بالادستی کی باتیں کر رہے ہیں۔

انہوں نے کہا کہ ماضی میں آئین کو توڑ موڑ کر اپنی کرپشن کی راہ ہموار کی جاتی رہی، جمہور کی بالادستی اصل میں آئین کی بالادستی ہے۔

شہباز گِل نے کہا کہ عمران خان جمہوریت اور آئین کے علمبردار ہیں، پاکستان کے مسائل کا حل کرپشن کے خاتمے اور قانون کی حکمرانی میں مضمر ہے۔

وزیراعظم کے معاون خصوصی برائے سیاسی ابلاغ ڈاکٹر شہباز گِل نے مزید کہا کہ آئینی بالادستی کے بھاشن دینے والے خود کو قانون سے بالاتر سمجھتے ہیں، آئین کی عزت دو نہیں ایک پاکستان کے نعرے میں ہے۔