سعودی عرب نے متحدہ عرب امارات سمیت تین ممالک کے لئے سفری پابندیاں ختم کرنے کا اعلان کردیا ہے۔

سعودی ایوی ایشن کے جاری کردہ نوٹیفکیشن کے مطابق سعودی عرب نے متحدہ عرب امارات، جنوبی افریقہ اور ارجنٹائن پر کورونا وائرس کی وجہ سے عائد عارضی سفری پابندیاں ختم کردی ہیں۔

نوٹیفکیشن کے مطابق جن تین ممالک کے لیے سفری پابندیاں اٹھائی گئی ہیں ان کے لیے ملک کی بحری اور فضائی سرحدیں کھول دی جائیں گی جبکہ ان ممالک میں رہنے والے سعودی شہری اب وطن واپس آسکیں گے

نوٹیفکیشن میں کہا گیا ہے کہ متحدہ عرب امارات، جنوبی افریقہ اور ارجنٹائن کے لیے مقامی وقت کے مطابق کل صبح 11 بجے سے عائد سفری پابندیاں اٹھالی جائیں گی۔

سعودی عرب کی جانب سے جاری کردہ نوٹیفکیشن میں مزید کہا گیا ہے کہ مسافروں کو تمام احتیاطی تدابیر کی پابندی کرنا ہوگی جبکہ گائیڈ لائنز پر عمل نہ کرنے والوں سے سختی سے نمٹا جائے گا۔

واضح رہے  کورونا وائرس کے خطرے کے پیش نظر بعض ممالک کے لیے سفر کو محدود کیا گیا تھا۔ ان ممالک کے سفر کے خواہش مند افراد کو پہلے مجاز حکام سے اجازت لینا  ضروری تھا۔

جن ممالک پر پابند ی عائد کی گئی تھی ان میں  ایتھوپیا، ویتنام، متحدہ عرب امارات اور افغانستان سے آنے والے مسافروں شامل تھے جبکہ ایسے مسافر جو مملکت میں داخلے سے قبل 14 دن کے قرنطینہ کے عمل سے گذر چکے ہوں انہیں سعودی عرب میں آنے سے نہیں روکا جائے گا۔