وزیر اعلیٰ خیبرپختونخوا محمود خان نے سینئر صحافی رحیم اللہ یوسفزئی کے انتقال پر افسوس کا اظہار کیا ہے۔

تفصیلات کے مطابق وزیر اعلیٰ خیبرپختونخوا محمود خان نے مرحوم رحیم اللہ یوسفزئی کی گرانقدر صحافتی اور سماجی خدمات کو خراج تحسین پیش کرتے ہوئے کہا کہ رحیم اللہ یوسفزئی کا انتقال نہ صرف اس کے خاندان بلکہ پورے صوبے اور صحافت کے لئے ناقابل تلافی نقصان ہے۔

وزیر اعلی خیبرپختونخوا محمود خان نے رحیم اللہ یوسفزئی کے غم زدہ خاندان کے ساتھ دلی ہمدردی اور تعزیت کا اظہار کیا ہے۔

محمود خان کا کہنا ہے کہ مرحوم افعان امور پر نہ صرف قومی بلکہ بین الاقوامی سطح پر بھی ایک مستند حیثیت رکھتے تھے اور مرحوم صحافت کے شعبے میں ایک ادارے کی حیثیت رکھتے تھے۔

محمود خان نے کہا ہے کہ رحیم اللہ یوسفزئی سے میرا ذاتی تعلق تھا وہ ایک قدآور صحافی ہونے کے ساتھ ساتھ ایک شریف النفس انسان تھے، رحیم اللہ جب بھی ملے تو علاقے کے مسائل اور صحافیوں کی فلاح و بہبود کی بات کی، مرحوم کی شاندار خدمات کو عرصہ دراز تک یاد رکھا جائے گا۔

وزیر اعلیٰ خیبرپختونخوا محمود خان نے مزید کہا ہے کہ صوبائی حکومت کوئی بڑا منصوبہ رحیم اللہ یوسفزئی کے نام سے منسوب کرے گی۔