آزاد کشمیر اور گلگت بلتستان کے مختلف علاقوں میں برفباری اور بارش  کے ساتھ موسم سرما نے آمد کی دستک دے دی ہے۔

محکمہ مو سمیات کے مطابق آزاد کشمیر اور گلگت بلتستان  کے بیشتر علاقوں میں بارش اور پہاڑوں پر برفباری  کا سلسلہ جاری ہے ، سرد ہواؤں نے موسم کا رخ بدل دیا ہے۔

گلگت بلتستان کے علاقے چلاس کے بالائی  مقامات بابوسر ٹاپ، فیری میڈوز اور بٹوگاہ ٹاپ سمیت متعدد مقامات پر وقفے وقفے سے برفباری  کا سلسلہ جاری ہے۔

آزاد کشمیر کی وادی لیپا نے بھی برف کی چادر اوڑھ لی ہے۔

اس کے علاوہ مظفر آباد، بھمبر، سماہنی، باغ اور نکیال سمیت مختلف شہروں میں صبح سویرے ہونے والی ہلکی اورتیز بارش سے موسم سرد ہو گیا ہے۔

محکمہ مو سمیات کے مطابق اسلام آباد، بالائی پنجاب، بالائی خیبرپختونخوا، گلگت بلتستان اور کشمیر میں گرج چمک کے ساتھ بارش اور بلند پہا ڑوں پر برف باری کا امکان ہے۔

ملک کے دیگر وسطی و جنو بی علاقوں میں موسم خشک رہے گا۔

محکمہ مو سمیات کے مطابق پیر کے روز ملک کے بیشتر علاقوں میں موسم خشک رہے گا۔ تاہم شمال مشرقی پنجاب، بالائی خیبرپختونخوا، گلگت بلتستان ، کشمیر میں چند مقامات پرتیزہواؤں اورگرج چمک کے ساتھ بارش اور بلند پہا ڑوں پر برف باری کا امکان ہے ۔

کراچی کا موسم 

کراچی میں آئندہ چوبیس گھنٹوں کے دوران موسم گرم اور خشک رہنے کا امکان ہے جبکہ شہر میں آج صبح کہر کے باعث حد نگاہ 4 کلو میٹر ریکارڈ کی گئی۔

محکمہ موسمیات کے مطابق کراچی میں کم سے کم درجۂ حرارت 17 اعشاریہ 9 ڈگری سینٹی گریڈ ریکارڈ کیا گیا۔

کراچی کا زیادہ سے زیادہ درجہ حرارت 36 سے 38 ڈگری سینٹی گریڈ کے درمیان بڑھنے کا امکان ہے۔

اس وقت کراچی میں شمال مغرب کی سمت سے ہلکی رفتار سے ہوائیں چل رہی ہیں جن میں نمی کا تناسب 13 فیصد ہے۔