وزیراعظم عمران خان کی زیر صدارت قومی سلامتی کمیٹی کا اجلاس ختم ہو گیا ہے۔

اعلامیے کے مطابق اجلاس میں افغانستان کی صورتحال پر تفصیلی گفتگو کی گئی ، اجلاس میں متعلقہ وفاقی وزراء اور تمام سروسز چیفس نے شرکت کی ، اجلاس میں انٹیلیجنس اداروں کے سربراہ بھی شریک ہوئے۔

جاری کردہ اعلامیے کے مطابق وزیراعظم کو خطے کی بدلتی صورتحال پر بریفنگ دی گئی ، افغانستان میں تبدیل ہوتی صورتحال اور اس کے پاکستان پر اثرات پر گفتگو کی گئی۔

بریفنگ میں بتایا گیا کہ پاکستان پر امن، مستحکم اور خود مختار افغانستان چاہتا ہے ، کسی انسانی المیے سے بچنے کے لیے عالمی برداری کو کردار ادا کرنا ہوگا۔

اس کے علاوہ وزیراعظم نے افغانستان میں پھنسے غیر ملکیوں کے انخلا میں معاونت پر اطمینان کا اظہار کیا۔

وزیراعظم عمران خان نے کہا کہ عالمی برادری نے بھی پاکستان کے کردار کی تعریف کی ، کوآرڈینیٹڈ پالیسی اقدامات کی ضرورت ہے۔