قومی کپتان بابر اعظم کا کہنا ہے کہ حارث رؤف نے آؤٹ اسٹینڈنگ بولنگ کی ہے۔

تفصیلات کے مطابق گزشتہ روز نیوزی لینڈ کے خلاف اپنے دوسرے میچ میں فتح پاکر کپتان بابر اعظم کا کہنا تھا کہ سب سے پہلے اللہ کا شکر ادا کرتے ہیں کہ ہم نے اچھی کرکٹ کھیلی اور کامیابی حاصل ہوئی ۔

بابر اعظم کا کہنا تھا کہ جیتنے سے کانفیڈنس آتا ہے اور ہماری کوشش رہے گی کہ ہم یہی کانفیڈنس لیکر آگے چلیں۔

ان کا مزید کہنا تھا کہ پوری ٹیم نے اچھی کوشش کی ، ہمارے بولرز اور اسپنرز کی اچھی کارکردگی کی وجہ سے ہی ہمیں کم ہدف ملا۔

بابر اعظم نے کہا کہ میرے حساب سے ہمیں 10 رنز کم کا ہدف ملنا تھا، لیکن یہ کرکٹ ہے اسکور اوپر نیچے ہوجاتا ہے۔

انہوں نے کہا کہ میں شعیب ملک کو بھی کریڈٹ دینا چاہتا ہوں، وہ سینئیر کھلاڑی ہیں ، انہوں نے میچ میں اپنا اچھا  تجربہ دکھایا۔

قومی کپتان کا مزید کہنا تھا کہ ہر میچ مشکل ہوتا ہے، ہماری کوشش ہے کہ ہر کھیل میں اچھی کارکردگی پیش کریں۔

واضح رہے کہ گزشتہ روز ہونے والے ٹی 20 ورلڈ کپ کے گروپ میچ میں پاکستان نے کیویز کو 5 وکٹوں سے شکست دے تھی۔

میچ میں پاکستان کے کپتان بابر اعظم نے نیوزی لینڈ کے خلاف ٹاس جیت کر بولنگ کا فیصلہ کیا تھا اور نیوزی لینڈ نے پاکستان کیخلاف مقررہ 20 اوورز میں 8 وکٹوں کے نقصان پر 134 رنز بنائے تھے۔

 پاکستان کی جانب سے حارث رؤف نے شاندار بولنگ کرتے ہوئے 22 رنز کے عوض 4 وکٹیں حاصل کی تھیں۔