مشیر خزانہ شوکت ترین کا کہنا ہے کہ آئی ایم ایف کے ساتھ معاملات طے پا گئے ہیں۔

شوکت ترین نے اسلام آباد میں ایک تقریب سے خطاب کے دوران کہا کہ آئی ایم ایف کے ساتھ معاہدہ اسی ہفتے ہو جائے گا۔

 مشیر خزانہ نے کہاکہ اسٹیٹ بینک سے متعلق قانون کیلئے آئینی ترامیم کی ضرورت ہے،آئینی ترمیم کیلئے ہمارے پاس دو تہائی اکثریت نہیں ہے، آئی ایم ایف کو یہی بات سمجھانے کی کوشش کی ہے۔

ان کا کہنا تھا کہ ایف بی آر اور نیشنل بینک کے بعد مزید سائبر حملوں کا خدشہ ہے،دشمن ملک ہمارے پڑوس میں بیٹھا ہے۔

 شوکت ترین نے کہاکہ سرکاری ملازمین کی تنخواہیں لیٹ نہیں ہونگی، صورت حال پر قابو پا لیا گیا ہے۔

مشیر خزانہ کا کہنا تھا کہ مہنگائی پر قابو پانے کیلئے ٹارگٹڈ سبسڈی دے رہے ہیں، مہنگائی ایک عالمی مسئلہ ہے، عالمی قیمتیں میرے کنٹرول میں نہیں ہیں، ڈالر کے ایکسچینج ریٹ کے حوالے سے گورنر اسٹیٹ بینک بتائیں گے۔

واضح رہے کہ گزشتہ روزمشیر خزانہ شوکت ترین نے سندھ میں دیگر صوبوں کے مقابلے میں مہنگا آٹا فروخت ہونے پر تشویش کا اظہار کرتے ہوئے متعلقہ حکام کو فوری اقدامات کی ہدایت کی تھی۔

مشیر خزانہ نے چیف سیکرٹری سندھ کو ہدایت کی کہ سندھ میں بھی گنے کی کرشنگ کا سیزن وقت پر شروع کیا جائے۔

شوکت ترین نے گنے کی امدادی قیمت کے حوالے سے اقدامات کی بھی ہدایت کی۔

اس مو قع پر صوبائی چیف سیکرٹریز کی جانب سے صوبوں میں اشیاء خوردونوش کے حوالے سے بریفنگ دی گئی۔