الیکٹرانک ووٹنگ مشین سے متعلق ترمیمی بل منظوری کے لیے صدر عارف علوی کو بھجوا دیا گیا ہے۔

بول نیوز کے مطابق قومی اسمبلی سیکرٹریٹ نے الیکٹرانک ووٹنگ مشین سے متعلق الیکشن دوسرا ترمیم بل 2021 صدر مملکت عارف علوی کو بھجوا دیا گیا ہے، ترمیمی بل کو وزارت پارلیمانی امور کے ذریعے بھجوایا گیا ہے۔ توقع کی جارہی ہے کہ صدر آئندہ ایک دو روز میں اس بل پر دستخط کردیں گے۔

صدر مملکت کی جانب سے حتمی منظوری کے بعد یہ بل قانون بن جائے گا اور فوری نافذ العمل ہوگا، اس سے سمندر پار پاکستانیوں کو ووٹ کا حق بھی مل جائے گا۔

آئین کے تحت پارلیمنٹ کی منظوری کے بعد منظور کئے گئے بل کو صدر مملکت کے پاس منظوری کے لیے بھیجا جاتا ہے، صدر مملکت کی جانب سے بل پر دستخط ہونے کے بعد اسے قانون کی حیثیت حاصل ہوجاتی ہے۔

قومی اسمبلی ذرائع کا کہنا ہے کہ مجموعی طور پر پارلیمنٹ کے مشترکہ اجلاس میں 33 بلز پاس کیے گیے تھے تاہم ایوان صدر کو دیگر منظور کئے گئے 32 بلز بھی مرحلہ وار بھجوا رہے ہیں۔

واضح رہے کہ اپوزیشن نے اپرلیمنٹ کے مشترکہ اجلاس میں منظور کئے گئے 33 بلوں کو سپریم کورٹ میں چیلنج کرنے کا اعلان کررکھا ہے تاہم اب تک کسی بھی سیاسی جماعت نے اس حوالے سے عدالت سے رجوع نہیں کیا۔