کراچی کے علاقے شاہ لطیف ٹاؤن میں گزشتہ شب زخمی حالت میں گرفتار ملزم نے گینگ وار کا نیٹ ورک چلانے کا انکشاف کیا ہے۔

ایس ایس پی ملیر عرفان بہادر کے مطابق گرفتار ملزم کا کرائم ڈیٹا حاصل کر لیا گیا، گرفتار ملزم کے سہیل ڈاڈا سے قریبی تعلقات تھے، گرفتار ملزم نے 2011 میں اسکریپ کے ڈیلر کو بھتہ نہ دینے پر فائرنگ کر کے قتل کر دیا تھا۔

ایس ایس پی ملیر کا کہنا تھا کہ گرفتار ملزم لالا زوہیب کوہی گوٹھ، شاہ لطیف میں ڈکیتی و راہزنی سمیت اسٹریٹ کرائم کی وارداتوں میں ملوث ملزمان کی ٹیم کی سربراہی کرتا تھا، گرفتار ملزم ڈکیتی مزاحمت پر شہریوں کو گولی مارنے سے دریغ نہیں کرتا تھا۔

عرفان بہادر نے بتایا کہ گرفتار ملزم عادی مجرم ہے اور 06 بار سنگین مقدمات میں گرفتار ہو کر جیل جا چکا ہے، گرفتار ملزم کے دیگر فرار ساتھیوں کی گرفتاری کیلئے تلاش جاری ہے، فرار ملزمان کی شناخت سمیت دیگر معلومات حاصل کر لی گئیں ہیں۔

ایس ایس پی ملیر عرفان بہادر کے مطابق گرفتار ملزم نے لوٹ مار کی درجنوں وارداتوں کا انکشاف کیا ہے، مزید پوچھ گچھ جاری ہے، پولیس ضابطے کی کارروائی عمل میں لا رہی ہے۔