وزیر خارجہ شاہ محمود قریشی نے کہا کہ ہے کہ پاکستان، ایران کے ساتھ دو طرفہ تعلقات کو مضبوط اقتصادی اور تجارتی شراکت داری میں تبدیل کرنے کا خواہاں ہے۔

چین میں منعقدہ افغانستان کے ہمسایہ ممالک کے تیسرے اجلاس کے موقع پر وزیر خارجہ مخدوم شاہ محمود قریشی کی ایران کے وزیر خارجہ حسین امیر عبداللہیان کے ساتھ ملاقات ہوئی ہے۔

اس ملاقات میں دو طرفہ تعلقات، علاقائی سلامتی اور باہمی دلچسپی کے اہم امور کے بارے میں تبادلہ خیال کیا گيا۔

وزیر خارجہ نے اسلام آباد میں حال ہی میں منعقد ہونے والے او آئی سی وزرائے خارجہ کونسل کے کے 48ویں اجلاس میں پاکستان کی طرف سے تجویز کردہ ‘جنوبی ایشیا میں سلامتی سے متعلق قرارداد’ پر حمایت کے لیے شکریہ ادا کیا۔

اس موقع پر ایران کے وزیر خارجہ حسین امیر عبداللہیان نے او آئی سی وزرائے خارجہ کونسل کے اڑتالیسویں اجلاس کی کامیاب میزبانی پر وزیر خارجہ مخدوم شاہ محمود قریشی اور پاکستانی قیادت کو خصوصی مبارکباد پیش کی۔

ملاقات کے دوران وزیر خارجہ کا کہنا تھا کہ پاکستان اور ایران کے درمیان یکساں عقیدے، ثقافت اور تاریخ کی بنیاد پر استوار گہرے برادرانہ تعلقات ہیں اور یہ امر باعث اطمینان ہے کہ پاکستان اور ایران کے مابین دوطرفہ تعلقات مزید مستحکم ہو رہے ہیں۔

 ان کا کہنا تھا کہ دونوں ممالک کے درمیان سیاسی، اقتصادی، دفاعی  اور انٹیلی جنس کے شعبوں میں اعلیٰ سطح کے تبادلے تعلقات میں استحکام کا مظہر ہیں۔

 اس موقع پر وزیر خارجہ نے دونوں ممالک کے درمیان اکیسویں مشترکہ اقتصادی کمیشن کے جلد انعقاد کی  ضرورت پر زور دیا اور ایرانی ہم منصب کو آگاہ کیا کہ پاکستان نے مند پشین سرحدی منڈی میں 85 فیصد سے زائد کام مکمل کر لیا ہے۔

ایرانی وزیر خارجہ نے جون 2022 تک مند پشین، گبڈ ریمدان اور میرجاوہ تفتان سرحدی منڈیوں کی تعمیر مکمل ہونے کا عندیہ دیا۔

شاہ محمود قریشی کا کہنا تھا کہ یہ بات باعث مسرت ہے کہ انٹرنیشنل روڈ ٹرانسپورٹ  میکانزم کے تحت پاکستان سے سامان کی پہلی کھیپ اکتوبر 2021 میں ایران سے گزرتے ہوئے ترکی پہنچی اور ہمیں امید ہے کہ ایران ٹی آئی آر کے تحت سامان کی ترسیل میں سہولت فراہم کرتا رہے گا۔

وزیر خارجہ نے ہر سال ایران آنے والے 50 لاکھ سے زائد پاکستانی زائرین کی خصوصی دیکھ بھال کرنے اور میرجاوہ میں زائرین ہاؤس کی تعمیر کرنے پر ایرانی ہم منصب کا شکریہ ادا کیا۔

علاوہ ازیں وزیر خارجہ نے، ایرانی وزیر خارجہ سے پاکستان ایمبیسی انٹرنیشنل اسکول  تہران کے لیے زمین مختص کرنے کی درخواست پر ہمدردانہ غور کرنے کی درخواست بھی کی ہے۔