ٹی ٹوئنٹی ورلڈ کپ میں سیمی فائنل میں جگہ بنانے والی انگلینڈ کی ٹیم کو سیمی فائنل میں اہم کھلاڑی کے بغیر میدان میں اترنا پڑ سکتا ہے۔

تفصیلات کے مطابق انگلینڈ کی کرکٹ ٹیم کے اہم بیٹسمین ڈیوڈ ملان کی انجری کے باعث ان کی سیمی فائنل میں شرکت مشکوک ہو گئی ہے۔

غیر ملکی میڈیا کے مطابق انگلینڈ کے 35 سالہ بیٹر سپر 12 میں سری لنکا کے خلاف میچ میں گروئن انجری کا شکار ہو گئے تھے، ڈیوڈ ملان گراؤنڈ سے باہر چلے گئے تھے اور وہ بیٹنگ کرنے بھی نہیں آئے تھے۔

میڈیا رپورٹس کے مطابق ڈیوڈ ملان کے ممکنہ متبادل کے طور پر وکٹ کیپر بیٹسمین فل سالٹ کو ٹیم میں شامل کرنے کا امکان ہے۔

حالیہ ٹی ٹوئنٹی ورلڈ کپ میں بائیں ہاتھ سے کھیلنے والے بیٹسمین ڈیوڈ ملان خاص کارکردگی کا مظاہرہ نہیں کر پائے ہیں، ان کا اس ایونٹ میں بہترین اسکور 37 گیندوں پر 35 رنز ہے جو انہوں نے آئرلینڈ کے خلاف بنائے تھے۔

یاد رہے کہ آئرلینڈ کے خلاف میچ میں انگلینڈ کو ڈک ورتھ لوئس کے تحت پانچ رنز کی اپ سیٹ شکست کا سامنا کرنا پڑا تھا۔

ڈیوڈ ملان کی انجری کے حوالے سے انگلش ٹیم کے نائب کپتان معین علی نے کہا کہ ڈیوڈ بڑے کھلاڑی ہیں اور کئی سال سے ٹیم میں موجود ہیں، لیکن ان کی انجری ٹھیک نہیں لگ رہی ہے۔

ڈیوڈ ملان کے ممکنہ متبادل فل سالٹ نے انگلینڈ کی جانب سے اب تک 11 ٹی ٹوئنٹی میچز میں حصہ لیا ہے، ٹی ٹوئنٹی میں ان کا بہترین اسکور 88 رنز ناٹ آؤٹ ہے جو انہوں نے ستمبر میں پاکستان کے خلاف سیریز میں بنایا تھا۔