توشہ خانہ کیس میں الیکشن کمیشن کی جانب سےعمران خان کی نا اہلی کے خلاف پٹیشن کی جلد سماعت کےلئےعدالت میں درخواست دائرکر دی گئی۔

تفصیلات کے مطابق توشہ خانہ کیس کے معاملے میں الیکشن کمیشن کی جانب سے سابق وزیراعظم اور سربراہ تحریکِ انصاف عمران خان کی نا اہلی کے خلاف پٹیشن کی جلد سماعت کےلئے لاہور ہائی کورٹ میں درخواست دائرکی گئی۔

درخواست گزار جابرعلی نے اظہر صدیق ایڈووکیٹ کے توسط سے درخواست دائرکی ہے جس میں مؤقف اختیار کیا گیا کہ سنگل بنچ کی سفارش پر عدالت عالیہ کا تین رکنی بنچ تشکیل دیا گیا۔

درخواست گزار جابرعلی کی جانب سے مؤقف اپنایا گیا کہ تین رکنی بنچ کے روبرو درخواست کی سماعت کی تاریخ مقررنہیں ہوئی۔  مفاد عامہ اور فوری انصاف کی فراہمی کےلئے کیس جلد سماعت کے لئے مقرر کیاجائے۔

درخواست میں الیکشن کمیشن کے نا اہل قراردینے کے اختیار کو چیلنج کیا گیا ہے جس میں کہا گیا کہ الیکشن کمیشن عدالت نہیں جو کسی کو نااہل قرار دے سکے۔

درخواست گزار نے عدالت سے استدعا کی کہ عدالت توشہ خانہ کے معاملے پر عمران خان کی الیکشن کمیشن سے نااہلی کا فیصلہ کالعدم قراردے۔