سابق وزیراعظم عمران خان کا کہنا ہے کہ مجوزہ ٹیکنوکریٹ نظام قابل قبول نہیں، سینیٹ میں حکومت کوٹف ٹائم دیا جائے۔

پاکستان تحریک انصاف کے چیئرمین عمران خان کی زیر صدارت زمان پارک میں اہم اجلاس ہوا جس میں پارٹی کی سینئر قیادت شریک ہوئی۔ اجلاس میں شاہ محمود، اسد عمر، پرویز خٹک، فواد چوہدری،  اور شاہ فرمان سمیت سنئیر لیڈرشپ موجود تھی۔

اجلاس میں پی ٹی آئی کے ارکان قومی اسمبلی کے استعفوں پر اسپیکر کے جوب کے بعد حکمت عملی پر غور کیا گیا اور (ق) لیگ کے ساتھ ہونے والی ممکنہ سیٹ ایڈجسٹمنٹ پر مشاورت کی گئی۔

یہ بھی پڑھیں؛ عمران خان کا بنی گالہ منتقل ہونے کا امکان

عمران خان کی زیر صدارت ہونے والے پنجاب میں وزیراعلی کے اعتماد کے ووٹ پر مشاورت کے ساتھ ساتھ اعتماد کے ووٹ کے بعد اسمبلی تحلیل کرنے کے معاملے پر بھی مشاورت کی گئی۔

علاوہ ازیں چیئرمین پی ٹی آئی عمران خان کی زیر صدارت پارٹی کے سینیٹرز کا اجلاس بھی ہوا۔ جس میں عمران خان نے پارٹی سینیٹرز کو ہدایت دی کہ مجوزہ ٹیکنوکریٹ نظام قابل قبول نہیں، سینیٹ میں حکومت کوٹف ٹائم دیا جائے۔

عمران خان کا کہنا تھا ملک کی معاشی اور سیاسی صورتحال تباہ کن ہے، اس حکومت میں گزرتا ہر لمحہ ملک کو تباہی کی سمت لے جارہا ہے۔ اجلاس میں ڈپٹی چیئرمین سینیٹ نے بھی شرکت کی جب کہ اسمبلیوں کی تحلیل پر بھی تفصیلی گفتگو کی گئی۔