پاکستان قومی کرکٹ ٹیم کے تیز رفتار بولر سہیل تنویر نے سوشل میڈیا کے ذریعے بین الاقوامی کرکٹ سے ریٹائرمنٹ کا اعلان کر دیا ہے۔

تفصیلات کے مطابق پاکستان کے بائیں ہاتھ کے فاسٹ بولر سہیل تنویر نے سماجی رابطے کی ویب سائٹ ٹوئٹر پر اپنی ایک پوسٹ میں تمام طرز کی کرکٹ سے ریٹائر ہونے کا اعلان کر دیا ہے۔

فاسٹ بولر سہیل تنویر نے ٹوئٹر پر لکھا کہ، وہ تمام طرز کی بین الاقوامی کرکٹ سے ریٹائر ہو رہے ہیں، تاہم ڈومیسٹک اور فرنچائز کرکٹ کھیلتے رہیں گے۔

سہیل تنویر نے پاکستان کرکٹ بورڈ کا شکریہ ادا کرتے ہوئے کہا کہ بین الاقوامی سطح پر مجھے کرکٹ کا موقع فراہم کرنے پر پی سی بی کا بے حد مشکور ہوں۔

پاکستان سپر لیگ میں کوئٹہ گلیڈی ایٹرز اور ملتان سلطانز کی نمائندگی کرنے والے فاسٹ بولر سہیل تنویر نے قومی کرکٹ ٹیم کی جانب سے 62 ون ڈے میچز، 2 ٹیسٹ میچز اور 57 ٹی ٹوئنٹی میچز کھیلے۔

فاسٹ بولر سہیل تنویر نے اپنے کیرئیر کے دوران ون ڈے میں 71، ٹی ٹوئنٹی میں 54 اور ٹیسٹ میں 5 وکٹیں حاصل کیں ہیں۔