مسلمان ممالک کی نمائندہ تنظیم او آئی سی نے مقبوضہ کشمیر پر بھارتی سپریم کورٹ کے متنازع فیصلے پر اپنی تشویش کا اظہار کیا ہے۔

عالمی خبر رساں ادارے کی خبر کے مطابق اسلامی تنظیم او آئی سی نے اپنے ایک بیان میں بھارت سے مقبوضہ کشمیر کی خصوصی حیثیت کے خاتمے کے حوالے سے آرٹیکل 370 کے سیاہ قانون کو برقرار رکھنے پر سخت تشویش کا اظہار کیا ہے۔

او آئی سی کے ترجمان نے بھارتی سپریم کورٹ کے فیصلے کو سخت تنقید کا نشانہ بناتے ہوئے مودی سرکار سے مطالبہ کیا ہے کہ مقبوضہ کشمیر کی خصوصی حیثیت کو برقرار رکھا جائے اور تمام فیصلوں کو کالعدم قرار دیا جائے۔

او آئی سی کے ترجمان کا کہنا تھا کہ مقبوضہ کشمیر عالمی سطح پر تسلیم شدہ متنازع علاقہ ہے اور اس علاقے کی حیثیت میں کسی بھی قسم کا ردوبدل عالمی قوانین کی خلاف ورزی ہے۔

عالمی خبر رساں ادارے کے مطابق او آئی سی نے مودی سرکار کی جانب سے 2019 میں مقبوضہ کشمیر کی خصوصی حیثیت کو ختم کرنے اور اسے بھارت میں ضم کرنے کے فیصلے پر اپنے مطالبے کو دہرایا  ہے۔

مسلمان ممالک کی تنظیم او آئی سی نے عالمی تنظیم اقوام متحدہ کو مقبوضہ کشمیر کے مسئلے کو قرارداد کے مطابق حل کرانے پر بھی زور دیا ہے۔

واضح رہے کہ بھارت کی حکمران جماعت مودی سرکار نے 4 سال قبل 2019 میں مقبوضہ کشمیر کی آرٹیکل 370 کے تحت خصوصی حیثیت کو ختم کرتے ہوئے اسے بھارت میں ضم کر لیا تھا۔