الیکشن کمیشن آف پاکستان نے قومی اسمبلی سمیت سندھ، پنجاب، خیبرپختون خوا اوربلوچستان اسمبلی کی نشستوں کاشیڈول جاری کر دیا۔

ضمنی انتخابات کے پُرامن انعقاد کی کوششوں کےلیے وزارت داخلہ، دفاع اورقانون نافذ کرنے والے اداروں سے رابطوں کے بعد  الیکشن کمیشن نے اعلامیہ جاری کردیا۔

الیکشن کمیشن نے قومی اسمبلی کی 6، پنجاب اسمبلی کی 12 نشستوں پر ضمنی انتخاب کا شیڈول جاری کیا۔ کے پی اسمبلی کی 2، سندھ کی 1 اور بلوچستان اسمبلی کی 2 نشستوں پرضمنی انتخابات ہونگے۔

الیکشن کمیشن کی جانب سے اعلامیے میں کہا گیا کہ ضمنی انتخابات میں 239 امیدواران حصہ لے رہے ہیں، قومی اسمبلی کی نشستوں کے لئے 50 امیدوارمد مقابل ہیں، این اے 207 پر آصفہ بھٹو زرداری بلا مقابلہ کامیاب ہوئیں۔

الیکشن کمیشن کے مطابق کے پی اسمبلی کی خالی نشستوں پر 23 امیدوار الیکشن میں حصہ لے رہے ہیں۔ پنجاب میں 154 امیدواروں کے درمیان مقابلہ ہے، سندھ اسمبلی کے حلقہ پی ایس 80 دادو پر امیدوار زبیر احمد جونیجو بلا مقابلہ کامیاب ہوئے جبکہ بلوچستان اسمبلی کی خالی نشستوں پر 12 امیدواروں کے درمیان مقابلہ ہوگا۔

ترجمان الیکشن کمیشن کے مطابق کمیشن نے ضروری الیکشن میٹریل صوبائی الیکشن کمشنرز کو مہیا کر دیا ہے، ضمنی انتخابات کے لیے بیلٹ پیپرز کی چھپائی کا کام شروع کیا جا رہا ہے۔