مسلم لیگ ن کے رہنما احسن اقبال نے پارلیمنٹ ہائوس کے باہر میڈیا سے گفتگو کرتے ہوئے کہا کہ مقبوضہ کشمیر کے عوام سے اظہار یک جہتی کے لیے آج مشترکہ اجلاس بلایا گیا۔

احسن اقبال نے کہا کہ بھارت کو ایسا کام کرنے کی 72 سال میں جرات نہیں ہوسکی تھی،یہ ایسا غیرآئینی کام ہے جس کے لیے ہر پاکستانی قربانی دینے کو تیار ہے۔

ان کا کہنا تھا کہ مودی سرکار نے سیکیورٹی کونسل کے فیصلے کو ردی کی ٹوکری میں پھینکنے کی کوشش کی، پاکستان کا بچہ بچہ کشمیر کیلئے قربانی دینے کو تیار ہے، پاکستان میں نا اہل حکومت ہے، نا اہل حکومت آج بھی اتحاد کا مظاہرہ نہیں کر سکی، مسئلہ کشمیر کیلئے ہم نے پروڈکشن آرڈر کا بھی مسئلہ نہیں اٹھایا۔

ان کا مزید کہنا تھا کہ بھارت نے کشمیر کی خصوصی حیثیت کو ختم کیا اور کشمیر کو بھارتی یونین میں شامل کرنے کی کوشش کی، بھارت نے لائن آف کنٹرول کو بین الاقوامی سرحد بنانی کی کوشش کی،اپوزیشن نے پارلیمنٹ میں کشمیریوں کی آواز بن کر احتجاج کیا، کشمیر کے ساتھ اس سے بڑی سازش نہیں ہو سکتی۔