وزیراعظم عمران خان نے کہا ہے کہ بہترین معاشی ٹیم کی وجہ سےاقتصادی چیلنجز پرقابو پارہے ہیں۔

تفصیلات کے مطابق وزیراعظم نے کاروبارمیں آسانیوں سےمتعلق تقریب سےخطاب کرتے ہوئے کہا کہ معاشی مشکلات کےباوجود حکومت نےملک سےغربت کے خاتمے کیلئےاحساس پروگرام شروع کیا۔

وزیراعظم نے کہا کہ 60 کی دہائی میں پاکستان دنیا میں تیزترین ترقی کرنے والا ملک تھا لیکن بدقسمتی سے پاکستان کےعام آدمی کو ترقی کے ثمرات نہیں ملے۔

عمران خان نے یہ بھی کہا کہ ہماری حکومت کومعاشی چیلنجزکا سامنا تھا جبکہ ماضی میں پاکستان نےصنعتوں کی وجہ سےنمایاں ترقی کی۔

عمران خان کا تقریب سے خطاب کرتے ہوئے کہنا تھا کہ ہمیں ابھی تک تجارتی خسارے کا سامنا ہےاور تجارتی خسارے میں کمی کیلئے ہماری کوششیں جاری ہیں

وزیراعظم عمران خان کا مزید کہنا تھا کہ ملکی ترقی کیلئے نظام تعلیم کو بہترکرنا ضروری ہے جبکہ بھرپورتعاون کرنے پر ورلڈ بینک کے مشکور ہیں۔

تقریب سے خطاب کرتے ہوئے وزیراعظم عمران خان نے رحیم یار خان میں تیزگام حادثے پر اظہار افسوس کرتے ہوئے کہا کہ ٹرین حادثےمیں قیمتی جانوں کےضیاع پرافسوس ہے، اللہ تعالیٰ لواحقین کوصدمہ برداشت کرنےکی طاقت عطا فرمائے اور اللہ تعالیٰ جاں بحق افرادکی مغفرت فرمائے۔

واضح رہے اس سے قبل وزیرِ اعظم عمران خان کی زیر صدارت ملک میں صنعت و حرفت کے فروغ کا جائزہ لینے کے حوالے سے اجلاس ہوا تھا۔

اجلاس میں ٹیرف کے موجودہ نظام اور اس میں بہتری لانے کے لئے اقدامات کا تفصیلی جائزہ لیا گیا جبکہ درآمدات پر ٹیرف کی شرح، موجودہ ٹیرف کے صنعت اور برآمدات پر اثرات اور ٹیرف کے نظام  میں مزید بہتری لانے کے  حوالے سے مشاورت بھی کی گئی تھی۔

عمران خان کا کہنا تھا کہ حکومت کاروباری برادری کو ہر ممکن سہولت فراہم کرنے کے لئے پر عزم ہے اوران اقدامات کا مقصد کاروباری طبقے کی مشکلات دور کرنا اور ان کو آسانیاں فراہم کرنا ہے۔

وزیراعظم عمران خان کا مزید کہنا تھا کہ کاروباری طبقے کو ساز گار ماحول کی فراہمی مقصد ہے، ہم چاہتے ہیں پاکستان پراڈکٹس خطے میں دوسرے ممالک کا مقابلہ کر سکیں اور بین الاقوامی مارکیٹ میں اپنا حصہ حاصل کریں۔