آرمی چیف جنرل قمرجاویدباجوہ  نے ترکی میں زلزلے میں جانی نقصان پر رنج و غم کا اظہار کیا ہے۔

پاک فوج کے شعبہ تعلقات عامہ(آئی ایس پی آر) کے مطابق آرمی چیف جنرل قمرجاویدباجوہ  نے ترکی میں زلزلے  سے ہونے والے جانی نقصان پر رنج و غم کا اظہار کرتے ہوئے کہا ہے کہ پاک فوج کادستہ امدادی کاموں میں حصہ لینے  کے لیے تیار ہے۔

آرمی چیف نے مزید کہا کہ اسپیشل ریسکیو اور ریلیف ٹیموں سمیت فیلڈ میڈیکل  سہولیات بھی تیار ہیں۔

واضح رہے کہ گذشتہ روز ترکی میں 6.8 شدت  کے زلزلے سے اب تک 18 افراد ہلاک  جبکہ سیکڑوں زخمی ہوگئے ہیں۔

ترک میڈیا رپورٹس کے مطابق 6 اعشاریہ 8 شدت کے زلزلے سے درجنوں عمارتیں ملبے کا ڈھیر ہو گئیں جبکہ کئی افراد اب بھی ملبے تلے دبے ہوئے ہیں۔

ترک ڈیزاسٹر اینڈ میجنمنٹ حکام کے مطابق زلزلے کا مرکز الیزگ کا علاقہ تھا جس کی زیرزمین گہرائی 6 اعشاریہ 7 کلومیٹر تھی۔ خطرناک زلزلے کے جھٹکے شام، جارجیا اور ارمینیا میں بھی محسوس کیےگئے۔

ریسکیو ٹیموں نے شدید سرد موسم کے باوجود ریسکیو کا کام شروع کر دیا ہے جب کہ ترک وزیر دفاع کا کہنا ہے کہ امدادی کاموں کے لیے فوج بھی متحرک  ہے۔

زلزلے کے باعث سیکڑوں کی تعداد میں لوگ بے گھر ہو گئے ہیں اور مواصلات کا نظام بھی بری طرح متاثر ہوا ہے۔

ترکی کے وزیر صحت نے زلزلے کے باعث 18 ہلاکتوں کی تصدیق کر دی ہے جب کہ 553 افراد زخمی ہیں جن میں سے 11 کی حالت تشویشناک  بتائی جاتی ہے۔

مقامی میڈیا کے مطابق جس وقت زلزلہ آیا تو ترکی کے وزیر داخلہ زلزلوں سے بچاؤ کے اقدامات کے حوالے سے اجلاس کی صدارت کررہے تھے۔

ترک صدر رجب طیب اردوگان نے زلزلے کے باعث ہونے والے جانی و مالی نقصان پر افسوس کا اظہار کرتے ہوئے کہا ہے کہ متاثرہ علاقوں میں تمام ضروری اقدامات اٹھائے جا رہے ہیں۔