معاون خصوصی ڈاکٹر فردوس عاشق اعوان نے کہا ہے کہ بھارتی جھوٹ پوری دنیا میں بے نقاب ہو رہا ہے۔

تفصیلات کے مطابق سماجی رابطے کی ویب سائٹ پر معاون خصوصی ڈاکٹر فردوس عاشق اعوان نے اپنے پیغام میں کہا ہے کہ کشمیر پر اقوام ِمتحدہ کےسیکرٹری جنرل کا بیان پاکستان اورکشمیریوں کےموقف کی جیت ہے، ہم اس کا خیر مقدم کرتے ہیں۔

مودی کے کشمیر کے حوالے سے "عالمی دباؤ کی پرواہ نہیں" کے بیان کی مذمت کرتے ہیں ۔ یہ بیان اس امر کا ثبوت ہے کہ جو بھی حق اور سچ کی بات کرے گا بھارت کو اس سے تکلیف ہو گی ۔ بھارتی جھوٹ پوری دنیا میں بے نقاب ہو رہا ہے ۔

— Dr. Firdous Ashiq Awan (@Dr_FirdousPTI) February 17, 2020

انہوں نے کہا کہ مودی کے کشمیر کے حوالے سے “عالمی دباؤ کی پرواہ نہیں”  کے بیان کی مذمت کرتے ہیں، یہ بیان اس امر کا ثبوت ہے کہ جو بھی حق اور سچ کی بات کرے گا بھارت کو اس سے تکلیف ہو گی۔

انہوں نے کہا کہ چالیس سال سے زائد عرصہ سے افغان مہاجرین کی دیکھ بھال کی کوششوں کااعتراف خطے میں پاکستان کے مثبت اور تعمیری کردار کی روشن دلیل ہے.پاکستان اور اقوام متحدہ عالمی امن،ترقی اور خوشحالی کے مشترکہ ایجنڈے پر کاربند ہیں۔

ان کا کہنا تھا کہ اقوام متحدہ کے سیکرٹری جنرل کا پاکستان میں امن کی بحالی اور دہشت گردی کے خلاف جنگ میں ذمہ دارانہ کردار کا اعتراف پوری دنیا کو پاکستان کے حوالے سے ایک مثبت پیغام اور پاکستان کے عالمی تشخص کو اجاگر کرنے کے حوالے سے اہم پیشرفت ہے۔

ڈاکٹر فردوس عاشق اعوان نے کہا ہے کہ اقوام متحدہ اپنےاصولی موقف سے آگے بڑھتے ہوئے بھارت کو کشمیر میں جابرانہ ظلم وستم سے روکے اور اپنی قرار دادوں کی روشنی میں کشمیریوں کو ان کا جائز ،قانونی اور جمہوری حق دلوائے۔