کراچی کے علاقے گولیمار میں رہائشی عمارت گرنے سے 16 افراد ہلاک ہو چکے ہیں تاہم ابھی ریسکیو آپریشن جاری ہے۔

واقعہ گولیمار نمبر دو میں رضویہ تھانے کے قریب پیش آیا جس کے نتیجے میں متعدد افراد زخمی بھی ہوئے،زخمیوں میں 42 سالہ خرم، 18 سالہ دانیال، 70 سالہ حمیدہ خاتون اور 8 سالہ حماد، 35 سالہ عارفہ اور 28 سالہ اویس شامل ہیں۔

انتظامیہ نےعمارت کا ملبہ ہٹانے کیلئے کئی گھنٹوں سے جاری ریسکیو آپریشن تیز کرنے کا فیصلہ کیا ہے اور مشینری طلب کرلی گئی۔

واضح رہے کہ آپریشن میں مختلف اداروں کے تازہ دم اہلکاروں کو پہنچا دیا گیا ہے، ملبے میں ممکنہ طور پر شہریوں کے دبے ہونے کے خدشے کے پیش نظر انتہائی احتیاط سے کام لیا جارہا ہے جبکہ آپریشن میں ڈسٹرکٹ و سٹی انتظامیہ، پاک آرمی، سندھ رینجرز، پولیس، فائربریگیڈ، ایدھی فاونڈیشن اور چھیپا ویلفئیر سمیت مختلف ریسکیو اداروں کے رضاکار بھی حصہ لے رہے ہیں۔