پاکستان کی ترجمان دفتر خارجہ ڈاکٹر عائشہ فاروقی نے کہا ہے کہ عید کے اس پرمسرت موقع پر پاکستان کی جانب سے طالبان اور افغان حکومت کے درمیان کی جنگ بندی کے فیصلے کا خیر مقدم کیا جاتا ہے۔

تفصیلات کے مطابق ڈاکٹر عائشہ فاروقی نے کہا کہ عید کے موقع پر طالبان اور افغان حکومت کے درمیان جنگ بندی معاہدے پر
پاکستان جنگ بندی کے اس معاہدے کا خیر مقدم کرتا ہے۔

ترجمان دفتر خارجہ نے عید کے موقع پر افغان بھائیوں کو عید کی مبارکباد پیش کی اور کہا کہ پرامن،مستحکم اور خوشحال افغانستان کی دعا کرتے ہیں۔

خیال رہے کہ اس سے قبل افغان طالبان کی طرف سے عید الفطر کے موقع پر تین دن کے لیے سیز فائر کا اعلان کردیا گیا۔

بین الاقوامی خبر رساں ادارے کے مطابق طالبان کی جانب سے جنگ بندی کا اعلان طالبان رہنما کے عیدالفطر کے پیغام کے بعد جاری کیا گیا جس میں انہوں نے کہا تھا کہ وہ امن معاہدے پر قائم ہیں۔

چیف ایگزیکٹیو افغانستان عبداللہ عبداللہ نے طالبان کی جانب سے کیے گئے اعلان کا خیر مقدم کیا۔

عبداللہ عبداللہ نے کہا کہ عید الفطر کے موقع پر طالبان کی جانب سے سیز فائر اعلان کا خیر مقدم کرتے ہیں ۔طالبان کی جانب سے عید الفطر کے موقع پر سیز فائر کا اعلان ملک میں قیام امن کی راہ میں اہم اقدام ہے۔
چیف ایگزیکٹیو افغانستان کا کہنا ہے کہ امید ہے کہ عید الفطر کے ایام میں جنگ بندی سے دونوں اطراف کے قیدیوں کے تبادلے میں مدد ملے گی، جنگ بندی کے اعلان سے تشدد کو کم کرنے اور بین الافغان مذاکرات میں بھی مدد ملے گی۔

انہوں نے کہا کہ افغانستان میں امن کا قیام ہماری پہلی ترجیح ہے۔ ہم جنگ بندی اور دیرپا امن کے حصول کے لیے ہر مثبت اقدام کا خیرمقدم کرتے ہیں ۔