لاہور میں پارکس اینڈ ہارٹی کلچر اتھارٹی کے ترجمان کا کہنا ہے کہ لاک ڈائون کے باوجود عوام کےلئے پارکس کو کھولنے سے متعلق مختلف تجاویز پر مشاورات اور غور  جاری ہے۔

تفصیلات کے مطابق پارکس اینڈ ہارٹی کلچر اتھارٹی ( پی ایچ اے) نے لاک ڈاؤن کے دوران اصول و ضوابط کے تحت تفریحی مقامات کو عوام کے لیے کھولنے کی تجویز پیش کر دی۔

ذرائع ے مطابق پارکس کو کھولنے سے متعلق مختلف تجاویز پر مشاورات اور غور  جاری ہے  تاہم  پہلے مرحلے میں پارکس میں جاگنگ اور ورزش کے لیے آنے والوں کو ریلیف دیا جائے گا جب کہ بچوں کے پلے لینڈ کو تاحکم ثانی بند رکھا جائے گا۔

پارکس کے داخلی راستوں پر جراثیم کش ہینڈ سینیٹائزر لگائے جائیں اور  پارکس میں آنے والوں کے لیے ماسک پہننا لازم قرار دیا جائے۔

واضح رہے کہ ترجمان پی ایچ اے کا کہنا ہے کہ شہر کے 5 بڑے پارکس کے لیےخصوصی طور پر ضابطہ اخلاق کی تیاری شروع کر دی گئی ہے جس میں باغ جناح، جیلانی پارک، گلشن اقبال پارک، گریٹراقبال پارک اور نیشنل پارک شامل ہیں۔