چئیرمین قومی احتساب بیورو جسٹس جاوید اقبال کی جانب سے کے الیکٹرک کے خلاف عوامی شکایات اور میڈیا رپورٹس کا نوٹس لے لیا گیا ہے۔

چیئرمین نیب نے حکم صادر کیا ہے کہ معاہدہ کی مبینہ طور پر مکمل پاسداری نہ کرنے کے الزام میں نیب کراچی کو انکوائری کی جائے۔

اس کے ساتھ ہی چئیرمین نیب نے نیب کراچی کو کے الیکٹرک کےخلاف تین ماہ میں انکوائری مکمل کرنے کی ہدایت کردی ہے

جسٹس جاوید اقبال کی جانب سے نیب کراچی کو کے الیکٹرک سے معاہدہ کی کاپی، متعلقہ دستاویزات اور سرمایہ کاری کی تفصیلات حاصل کرنے کی ہدایت کردی گئی ہے۔

اس سے متعلق چیئرمین نیب کا کہنا ہے کہ نیب قانون کے مطابق ہمیشہ اپنے فرائض سر انجام دینے پر یقین رکھتا ہے اور نیب، کے الیکٹرک کو عوام سے اربوں روپے کی رقوم ہتھیانے اور غیر اعلانیہ طویل لوڈ شیڈنگ اور معاہدہ کی پاسداری نہ کرنے  کی اجازت نہیں دے گا۔

ان کا کہنا تھا کہ نیب بلاتفریق احتساب پر یقین رکھتا ہے۔

دوسری جانب ترجمان نیب کا کہنا ہے کہ کے الیکٹرک نے مبینہ طور پر بجلی کے نظام کو جدید خطوط پر استوار کرتے ہوئے مطلوبہ سرمایہ کاری کرنی تھی لیکن کے الکٹرک نے معاہدہ کی مبینہ طور پر مکمل پاسداری نہیں کی اور اسی لئے نیب کی جانب سے اس ادارے کے خلاف اقدامات کئے جارہے ہیں۔