وزیر اعظم عمران خان کا کہنا ہے کہ ہماری  کوشش ہے سینیٹ انتخابات اوپن ووٹنگ سے ہوجائیں۔

تفصیلات کے مطابق وزیراعظم عمران خان کی زیر صدارت پارٹی رہنماؤں اور ترجمانوں کا اہم اجلاس  ہوا۔

اجلاس میں سینیٹ انتخابات، فارن فنڈنگ کیس، سانحہ مچھ اور براڈشیٹ کے معاملے پر گفتگو کی گئی۔  اپوزیشن کے الیکشن کمیشن کے باہر احتجاج کے معاملے پر بھی حکمت عملی طے کی گئی۔

سید ذولفقار عباس بخاری نے سانحہ مچھ اور لواحقین سے مذاکرات پر بریفنگ دی۔

وزیر اعظم نے کہا کہ  سانحہ مچھ انتہائی افسوسناک ہے، مستقبل میں ایسے واقعات کے تدارک کے لیے اقدامات کررہے ہیں۔ سانحہ مچھ کے مجرموں کو کیفر کردار تک پہنچائیں گے، ایسے مجرم کسی رعایت کے مستحق نہیں ہیں۔

وزیراعظم  نے سینیٹ انتخابات سے متعلق حکمت عملی بنانے کی ہدایت کرتے ہوئے اس عزم کا اظہار کیا کہ  سینیٹ انتخابات میں بھی ہم کامیابی حاصل کریں گے۔

وزیراعظم  نے فارن فنڈنگ کیس سے متعلق حقائق قوم کے سامنے رکھنے کی ہدایت کرتے ہوئے کہا کہ  فارن فنڈنگ کیس میں اپوزیشن کے پراپیگنڈہ کو کاؤنٹر کریں۔

عمران خان نے کہا کہ  الیکشن کمیشن میں ہمارے جواب اور اپوزیشن کے کیسز سے متعلق حقائق بتائے جائیں۔

اجلاس میں براڈشیٹ کا معاملہ بھی زیر غور آیا۔

وزیر اعظم نے کہا کہ  براڈشیٹ کے دعوے کو عوام میں اجاگر کریں۔نوازشریف نے براڈشیٹ کو بھی خریدنے کی کوشش کی۔

عمران خان نے ٹاک شوز میں حکومتی حکمت عملی سے آگاہ کرنے کی ہدایت کرتے ہوئے کہا کہ  عوام کو ان کے پراپیگنڈے سے متعلق آگاہ کریں۔

اجلاس میں سینیٹ انتخابات اوپن ووٹنگ سے کروانے سے متعلق  بھی گفتگو  ہوئی۔

وزیر اعظم نے کہا کہ کوشش ہے انتخابات اوپن ووٹنگ سے ہوجائیں۔   ہم چاہتے ہیں سینیٹ انتخابات میں خریدوفروخت بند ہو۔