وزیر اطلاعات گلگت بلتستان فتح اللہ خان نے علی سدپارہ سمیت تینوں لاپتہ کوہ پیماؤں کے جسد خاکی ملنے کی تصدیق کردی ہے۔

تفصیلات کے مطابق وزیر اطلاعات گلگت بلتستان فتح اللہ خان نے دعویٰ کیا ہے کہ کے ٹو پر علی سدپارہ،  جان اسنوری اور جوآن پابلو موہر  کے جسد خاکی مل گئے ہیں۔

وزیر اطلاعات گلگت بلتستان کا کہنا ہے کہ صبح 9 بجے جسد خاکی دور سے دیکھے گئے، آج شام تک تینوں کوہ پیما کے جسد خاکی تک پہنچ جائیں گے۔

فتح اللہ خان کا کہنا ہے کہ تین کوہ پیماؤں کے جسد خاکی بوٹل نیک بیس کیمپ سے ملے ہیں، آرمی کے ہیلی کاپٹر کے ذریعے جسد خاکی کو نیچے لایا جائے گا، ابھی ریسکیو  کے لیے ہیلی کاپٹر اسٹینڈ بائی ہیں۔

ان کا کہنا ہے کہ تین جسد خاکی ملے ہیں  جس میں سے دو کی شناخت ہوئی ہے، جو کپڑے علی سدپارہ نے پہنے تھے اس سے شناخت ہوئی ہے، ایک جسد خاکی کے کپڑوں سے لگتاہے کہ وہ جان اسنوری کا ہوسکتا ہے۔

وزیر اطلاعات نے دعویٰ کیا ہے کہ کل تک تینوں جسد خاکی حکومت کی تحویل میں آجائیں گے۔