گلگت بلتستان کے صوبائی وزیرِ اطلاعات فتح اللہ خان نے کہا ہے کہ پیپلز پارٹی کو اپنا غرور لے ڈوبا ہے۔

تفصیلات کے مطابق گلگت بلتستان میں صوبائی وزراء کی نیوز کانفرنس ہوئی جس میں صوبائی وزیرِ اطلاعات فتح اللہ خان نے کہا کہ نگر میں صاف شفاف ضمنی انتخابات کرانے پر الیکشن کمیشن کو خراجِ تحسین پیش کرتے ہیں۔

فتح اللہ خان کا کہنا تھا کہ اسلامی تحریک کے کامیاب امیدوار ایوب وزیری کو مبارکباد پیش کرتے ہیں، ہارنے کے باوجود ہم الزامات کے بجائے ہار کو کھلے دل سے تسلیم کرتے ہیں۔

انہوں نے کہا کہ بلاول بھٹو زرداری کی الیکشن میں دھاندلی کے حوالے سے ٹویٹ قابلِ افسوس ہے، پیپلز پارٹی کو اپنا غرور لے ڈوبا ہے ۔

ان کا کہنا تھا کہ بلاول بھٹو زرداری نے سندھ کو تو ڈوبو دیا ابھی وہی کھیل یہاں کھیلنا چاہتے ہیں، پیپلز پارٹی کو مشورہ دیتا ہوں کہ گلگت بلتستان کے سیاست کا جو انداز ہے اس کو تبدیل کرنے کی کوشش نہ کریں۔

فتح اللہ خان نے کہا کہ الزامات وہی جماعت لگا رہی ہے جنھوں نے پارٹی کا جنازہ سندھ میں نکالا ہے، وہاں کی عوام بھوک اور افلاس کا شکار ہیں۔

صوبائی وزیرِ اطلاعات فتح اللہ خان کا کہنا تھا کہ ہماری پارٹی نے کمپین کے دوران اچھی پوزیشن بنائی تھی مگرعوام نے سیاسی حق کا استعمال کیا اور شفاف الیکشن ہوئے تو ہمیں کوئی اعتراض نہیں، عوام نے اپنے ووٹ کے ذریعے اپنے رائے کا اظہار کیا ہے۔

صوبائی وزیرِ خزانہ جاوید منوا نے کہا کہ نگر الیکشن پرامن اور شفاف رہے، ہمارے امیدوار آغا بہشتی نے مقابلہ زبردست کیا ہے۔